IRINJALAKUDA TIMES
ഇരിങ്ങാലക്കുട : കണ്ഠേശ്വരം മഹാദേവ ക്ഷേത്രത്തിലെ ഇല്ലംനിറ 29ന് നടക്കും.
കണ്ഠേശ്വരം സെന്ററിൽ നിന്നും പഞ്ചവാദ്യത്തിന്റെ അകമ്പടിയോടെ നെൽക്കതിരുകൾ ക്ഷേത്രത്തിൽ എത്തിച്ച് തന്ത്രി നഗരമണ്ണ് ത്രിവിക്രമൻ നമ്പൂതിരിയുടെ മുഖ്യ കാർമ്മികത്വത്തിൽ 9.35 മുതലാണ് ഇല്ലംനിറ ചടങ്ങുകൾ നടക്കുക.
ഇരിങ്ങാലക്കുട : നഗരസഭ 21-ാം വാർഡിലെ കനാൽ ബേസിൽ കഴിഞ്ഞ ദിവസം ചത്ത പട്ടിക്കുട്ടിക്ക് പേവിഷബാധ ഉള്ളതായി പോസ്റ്റ്മോർട്ടം റിപ്പോർട്ട്.
പട്ടിക്കുട്ടി പ്രദേശവാസികളായ 3 പേരെ കടിച്ചിട്ടുണ്ട്. ഇതോടെ സമീപവാസികൾ പരിഭ്രാന്തിയിലാണ്.
തിങ്കളാഴ്ചയാണ് പട്ടിക്കുട്ടി 3 പേരെ കടിച്ചത്. പിന്നീട് വൈകുന്നേരത്തോടെ പട്ടിക്കുട്ടിയെ ചത്ത നിലയിൽ കണ്ടെത്തുകയായിരുന്നു.
തൃശൂർ വെറ്റിനറി ആശുപത്രിയിലാണ് ചത്ത പട്ടിക്കുട്ടിയുടെ പോസ്റ്റ്മോർട്ടം നടപടികൾ നടത്തിയത്.
ഇരിങ്ങാലക്കുട : കാട്ടുങ്ങച്ചിറയിൽ കിണറ്റിൽ വീണ ചിറയിൽ വീട്ടിൽ ഹീരലാലിന്റെ സഹോദരി മെഹരുന്നീസ(62)യ്ക്ക് രക്ഷകരായി ഇരിങ്ങാലക്കുട അഗ്നിരക്ഷാസേന.
കിണറ്റിൽ വീണ മെഹരുന്നിസയെ അഗ്നിരക്ഷാസേന എത്തുംവരെ സഹോദരൻ ഹീരലാൽ കിണറ്റിലിറങ്ങി പിടിച്ചു കിടന്നു.
സേന ഉദ്യോഗസ്ഥനായ അനീഷ് ആണ് കിണറ്റിലിറങ്ങി നെറ്റിന്റെയും റോപ്പിന്റെയും സഹായത്താൽ ഇരുവരെയും കരയ്ക്ക് കയറ്റിയത്.
അസിസ്റ്റന്റ് സ്റ്റേഷൻ ഓഫീസർ സുധന്റെ നേതൃത്വത്തിൽ സീനിയർ ഫയർ ആൻഡ് റെസ്ക്യൂ ഓഫീസർ സജയൻ, ഫയർ ആൻഡ് റെസ്ക്യൂ ഓഫീസർമാരായ ദിലീപ്, ശ്രീജിത്ത്, ശിവപ്രസാദ്, സന്ദീപ്, മണികണ്ഠൻ, ഹോം ഗാർഡ്മാരായ ജൈജോ, ലിസ്സൻ, സുഭാഷ് എന്നിവരും രക്ഷാദൗത്യത്തിൽ ഉണ്ടായിരുന്നു.
ഇരിങ്ങാലക്കുട : ഇരിങ്ങാലക്കുട നിയോജകമണ്ഡലത്തിലെ തകർന്നടിഞ്ഞ റോഡുകൾ നന്നാക്കുക, തൃശൂർ – കൊടുങ്ങല്ലൂർ പാതയുടെ നിർമ്മാണത്തിന്റെ മെല്ലെ പോക്ക് അവസാനിപ്പിക്കുക, ഠാണാവിലെ രൂക്ഷമായ ഗതാഗതക്കുരുക്ക് അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ച് ഇരിങ്ങാലക്കുട – കാട്ടൂർ ബ്ലോക്ക് കോൺഗ്രസ് കമ്മിറ്റികളുടെ സംയുക്ത ആഭിമുഖ്യത്തിൽ മന്ത്രി ഡോ. ആർ. ബിന്ദുവിൻ്റെ ഓഫീസിലേക്ക് പ്രതിഷേധ മാർച്ച് നടത്തി.
പൂതംകുളം മൈതാനിയിൽ നിന്നും ആരംഭിച്ച മാർച്ച് കെപിസിസി സെക്രട്ടറി സുനിൽ അന്തിക്കാട് ഉദ്ഘാടനം ചെയ്തു.
ഇരിങ്ങാലക്കുട ബ്ലോക്ക് കോൺഗ്രസ് പ്രസിഡൻ്റ് സോമൻ ചിറ്റേത്ത് അധ്യക്ഷത വഹിച്ചു.
കാട്ടൂർ ബ്ലോക്ക് കോൺഗ്രസ് പ്രസിഡന്റ് ഷാറ്റൊ കുര്യൻ സ്വാഗതം പറഞ്ഞു.
ഡിസിസി സെക്രട്ടറിമാരായ ആൻ്റോ പെരുമ്പിള്ളി, കെ.കെ. ശോഭനൻ, അഡ്വ. സതീഷ് വിമലൻ, മണ്ഡലം പ്രസിഡൻ്റുമാരായ അബ്ദുൽ ഹഖ്, ബാബു തോമസ്, ശശികുമാർ ഇടപ്പുഴ, എ.പി. വിൽസൺ, എൻ. ശ്രീകുമാർ, എ.ഐ. സിദ്ധാർത്ഥൻ, പി.കെ. ഭാസി, സാജു പാറേക്കാടൻ എന്നിവർ പ്രസംഗിച്ചു.
ബ്ലോക്ക് – മണ്ഡലം ഭാരവാഹികൾ, പോഷക സംഘടനകളുടെ ഭാരവാഹികൾ എന്നിവർ നേതൃത്വം നൽകി.
ഇരിങ്ങാലക്കുട : മുകുന്ദപുരം താലൂക്ക് എൻ.എസ്.എസ്. യൂണിയൻ്റെ ആഭിമുഖ്യത്തിൽ അത്തം നാളിൽ നടത്തിയ പൂക്കളമത്സരത്തിൽ കൊരട്ടി മേഖലയിലെ കാടുകുറ്റി കരയോഗം ജേതാക്കളായി. 7500 രൂപയും ഫലകവും സർട്ടിഫിക്കറ്റുമാണ് സമ്മാനം.
രണ്ടാം സ്ഥാനം കരസ്ഥമാക്കിയ കോടാലി മേഖലയിലെ കുറ്റിച്ചിറ കരയോഗത്തിനാണ് 5000 രൂപയും ഫലകവും സർട്ടിഫിക്കറ്റും മൂന്നാമതെത്തിയ കുഴൂർ മേഖലയിലെ ഐരാണിക്കുളം കരയോഗത്തിന് 2500 രൂപയും ഫലകവും സർട്ടിഫിക്കറ്റും സമ്മാനമായി നൽകി.
പങ്കെടുത്ത മുഴുവൻ കരയോഗങ്ങൾക്കും പ്രോത്സാഹന സമ്മാനമായി ക്യാഷ് അവാർഡ് നൽകി.
താലൂക്ക് യൂണിയൻ ചെയർമാൻ അഡ്വ. ഡി. ശങ്കരൻകുട്ടി സമ്മാനങ്ങൾ വിതരണം ചെയ്തു.
യൂണിയൻ സെക്രട്ടറി എസ്. കൃഷ്ണകുമാർ സ്വാഗതവും യൂണിയൻ കമ്മിറ്റി അംഗം നന്ദൻ പറമ്പത്ത് നന്ദിയും പറഞ്ഞു.
പ്രോഗ്രാം കോർഡിനേറ്റർ ആർ. ബാലകൃഷ്ണൻ, യൂണിയൻ കമ്മിറ്റി അംഗങ്ങളായ സുനിൽ കെ. മേനോൻ, എ.ജി. മണികണ്ഠൻ, സി. വിജയൻ, പി.ആർ. അജിത്കുമാർ, എൻ. ഗോവിന്ദൻകുട്ടി, രവി കണ്ണൂർ, കെ. രാജഗോപാലൻ, പ്രതിനിധി സഭാംഗങ്ങളായ സി.ബി. രാജൻ, എസ്. ഹരീഷ്കുമാർ, കെ.ആർ. മോഹനൻ, കെ.ബി. ശ്രീധരൻ, യൂണിയൻ ഇലക്ട്രറൽ റോൾ മെമ്പർ എം. ശ്രീകുമാർ, വനിതാ യൂണിയൻ വൈസ് പ്രസിഡൻ്റ് ചന്ദ്രിക സുരേഷ്, അംഗങ്ങളായ സ്മിത ജയകുമാർ, ശ്രീദേവി മേനോൻ, രമ ശിവൻ, മായ നന്ദകുമാർ, യൂണിയൻ ഇൻസ്പെക്ടർ ബി. രതീഷ് തുടങ്ങിയവർ പങ്കെടുത്തു.
സദാനന്ദൻ
ഇരിങ്ങാലക്കുട : കോണത്തുകുന്ന് ആലുക്കത്തറ ശങ്കരൻകുട്ടി മകൻ സദാനന്ദൻ (64) നിര്യാതനായി.
സംസ്കാരം നടത്തി.
മേരി
ഇരിങ്ങാലക്കുട : മാർക്കറ്റ് ലിങ്ക് റോഡിൽ പ്ലാശ്ശേരി ചുക്കിരിയാൻ പോൾ ഭാര്യ മേരി (മറിയംകുട്ടി- 91) നിര്യാതയായി.
സംസ്കാരം ബുധനാഴ്ച (ആഗസ്റ്റ് 27) ഉച്ചതിരിഞ്ഞ് 3.30ന് ഇരിങ്ങാലക്കുട സെന്റ് തോമസ് കത്തീഡ്രൽ ദേവാലയ സെമിത്തേരിയിൽ.
മക്കൾ : ഷീബ, ആന്റോ, വർഗ്ഗീസ് കുട്ടി
മരുമക്കൾ : ജോർജ്ജ്, ലീമ, ലാന്റി
ഇരിങ്ങാലക്കുട : സേവാഭാരതി, കൊമ്പൊടിഞ്ഞാമക്കൽ ലയൺസ് ക്ലബ്ബിൻ്റെയും കൊച്ചിൻ ഐ ഫൗണ്ടേഷൻ ഹോസ്പിറ്റലിന്റെയും സഹകരണത്തോടെ എല്ലാമാസവും നടത്തിവരാറുള്ള നേത്ര തിമിര പരിശോധന ക്യാമ്പ് ആഗസ്റ്റ് 30 ശനിയാഴ്ച രാവിലെ 9 മണി മുതൽ ഉച്ചയ്ക്ക് 1 മണി വരെ ഇരിങ്ങാലക്കുട സേവാഭാരതി ഓഫീസിൽ വച്ച് സംഘടിപ്പിക്കും.
കൗൺസിലർ മായ അജയൻ ക്യാമ്പ് ഉദ്ഘാടനം ചെയ്യും.
സേവാഭാരതി പ്രസിഡൻ്റ് നളിൻ ബാബു അധ്യക്ഷത വഹിക്കും.
സാമൂഹ്യപ്രവർത്തകനായ ജോൺസൺ കോലങ്കണ്ണി മുഖ്യാതിഥിയായിരിക്കും.
കൂടുതൽ വിവരങ്ങൾക്ക് : 9496649657
ഇരിങ്ങാലക്കുട : നെതർലാൻഡ് ഔട്രെക്ട് യൂണിവേഴ്സിറ്റിയിൽ പ്രൊഫ. അന്ന അഖ് മനോവയുടെ കീഴിൽ ഇൻവെസ്റ്റിഗേഷൻ ഓഫ് വെഹിക്കിൾ ട്രാഫിക്കിങ് ടു പ്രൈമറി സിലിയ എന്ന വിഷയത്തിൽ പി.എച്ച്.ഡി. ചെയ്യുന്നതിനായി മേരി ക്യുറി ഡോക്ടറൽ ഫെല്ലോഷിപ്പ് ലഭിച്ച ശ്രീലക്ഷ്മി ടി. രഞ്ജിത്തിനെ കൊടുങ്ങല്ലൂർ ആസ്ഥാനമായി പ്രവർത്തിക്കുന്ന തളിക്കൽ കുടുംബക്ഷേമ ട്രസ്റ്റ് ആദരിച്ചു.
ഇരിങ്ങാലക്കുട : കൽപ്പറമ്പ് സ്കൂളിൽ വെച്ച് ചേർന്ന് ഇരിങ്ങാലക്കുട ഉപജില്ലാ ശാസ്ത്രോത്സവ സംഘാടക സമിതി യോഗം ബ്ലോക്ക് പഞ്ചായത്ത് പ്രസിഡൻ്റ് സുധ ദിലീപ് ഉദ്ഘാടനം ചെയ്തു.
വൈസ് പ്രസിഡൻ്റ് ഉണ്ണികൃഷ്ണൻ കുറ്റിപറമ്പിൽ അധ്യക്ഷത വഹിച്ചു.
വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ അസ്മാ ബീവി ലത്തീഫ് മുഖ്യാതിഥിയായി.
സ്കൂൾ മാനേജർ ഫാ. പോളി കണ്ണൂക്കാടൻ അനുഗ്രഹ പ്രഭാഷണം നടത്തി.
ഉപജില്ല വിദ്യാഭ്യാസ ഓഫീസർ എം.എസ്. രാജീവ് നടപടിക്രമങ്ങൾ വിശദീകരിച്ചു.
പഞ്ചായത്ത് സ്റ്റാൻഡിങ് കമ്മിറ്റി മെമ്പർ കത്രീന ജോർജ്ജ്, വാർഡ് മെമ്പർ ജൂലി ജോയ്, ബി.വി.എം.എച്ച്.എസ്.എസ്. പിടിഎ പ്രസിഡൻ്റ് മേരി കവിത, വടക്കുംകര ജി.യു.പി.എസ്. പി.ടി.എ. പ്രസിഡൻ്റ് രാധാകൃഷ്ണൻ, എച്ച്.സി.സി.എൽ.പി.എസ്. പി.ടി.എ. പ്രസിഡൻ്റ് വിക്ടർ, ബി.വി.എം.എച്ച്.എസ്. ഹെഡ്മിസ്ട്രസ്സ് എ.ജെ. ജെൻസി, ജി.യു.പി.എസ്. ഹെഡ്മിസ്ട്രസ്സ് ഷിനി, എച്ച്.സി.സി.എൽ.പി.എസ്. ഹെഡ്മിസ്ട്രസ്സ് സിസ്റ്റർ ജസ്ന എന്നിവർ ആശംസകൾ അർപ്പിച്ചു.
പ്രിൻസിപ്പൽ ബിജു ആന്റണി സ്വാഗതവും വികസന സമിതി കൺവീനർ ഡോ. കെ.വി. രാജേഷ് നന്ദി പറഞ്ഞു.
ഒക്ടോബർ 8, 9,10 തിയ്യതികളിലായി കൽപ്പറമ്പ് ബി.വി.എം.എച്ച്.എസ്.എസ്., വടക്കുംകര ജി.യു.പി.എസ്., കൽപ്പറമ്പ് എച്ച്.സി.സി.എൽ.പി.എസ്. എന്നീ മൂന്ന് സ്കൂളുകളിലായാണ് ഇരിങ്ങാലക്കുട ഉപജില്ല ശാസ്ത്രോത്സവം നടക്കുന്നത്.
