ഇരിങ്ങാലക്കുട : നഗരത്തിലെ വികസന പ്രവർത്തനങ്ങൾക്ക് നാട് കടപ്പെട്ടിരിക്കുന്നത് യു.ഡി.എഫിനോടാണെന്നും വികസന പ്രവർത്തനങ്ങൾ എത്രയും വേഗം പൂർത്തീകരിക്കണമെന്നും കേരള കോൺഗ്രസ്സിന്റെ ടൗൺ നോർത്ത് സോൺ കുടുംബ സംഗമം അഭിപ്രായപ്പെട്ടു.
നിയോജക മണ്ഡലത്തിൽ നടക്കുന്ന 100 കുടുംബ സംഗമങ്ങളുടെ ഭാഗമായി ഇരിങ്ങാലക്കുട മുനിസിപ്പൽ ടൗൺ മണ്ഡലം കമ്മിറ്റിയുടെ ആഭിമുഖ്യത്തിൽ ജില്ലാ സെക്രട്ടറി പി.ടി. ജോർജ്ജിന്റെ അധ്യക്ഷതയിൽ കൂടിയ സംഗമത്തിലാണ് ഈ അഭിപ്രായം ഉണ്ടായത്.
ഠാണാ- ചന്തക്കുന്ന് വികസനം, ജനറൽ ആശുപത്രി, കോർട്ട കോംപ്ലക്സ് എന്നിവ യു.ഡി.എഫ്. ഭരണകാലത്ത് മുൻ എംഎൽഎ തോമസ് ഉണ്ണിയാടന്റെ ശ്രമഫലമായി കൊണ്ടുവന്നിട്ടുള്ളതും നിർമ്മാണപ്രവർത്തനങ്ങൾ ആരംഭിച്ചിരുന്നതുമാണ്. എന്നാൽ പിന്നീട് വന്ന എൽഡിഎഫ് ജനപ്രതിനിധികൾ വേണ്ടത്ര പ്രാധാന്യം കൊടുക്കാതിരുന്നതു മൂലം ഈ പ്രവർത്തനങ്ങൾ സാവകാശമായ നിലയിലാകുകയും ചെയ്തു. എന്നാൽ ഈ വികസന പ്രവർത്തനങ്ങളിൽ ഇപ്പോൾ അവകാശവാദം അവർ ഉന്നയിച്ചിരിക്കുന്നത് അപഹാസ്യകരമാണെന്ന് കുടുംബ സംഗമം കുറ്റപ്പെടുത്തി.
ഇരിങ്ങാലക്കുട മുനിസിപ്പൽ ടൗണിൽ തല ഉയർത്തി നിൽക്കുന്ന ഒട്ടുമിക്ക വികസന പ്രവർത്തനങ്ങളും യുഡിഎഫ് സംഭാവനകളാണെന്നത് അവിതർക്കിതമായ സത്യങ്ങളാണെന്നും സംഗമം ചൂണ്ടിക്കാട്ടി.
കുടുംബ സംഗമം കേരള കോൺഗ്രസ്സ് ഡെപ്യൂട്ടി ചെയർമാൻ അഡ്വ. തോമസ് ഉണ്ണിയാടൻ ഉദ്ഘാടനം ചെയ്തു.
സംസ്ഥാന ജനറൽ സെക്രട്ടറി മിനി മോഹൻദാസ്, നിയോജക മണ്ഡലം പ്രസിഡന്റ് റോക്കി ആളൂക്കാരൻ എന്നിവർ മുഖ്യപ്രഭാഷണം നടത്തി.
ഭാരവാഹികളായ വർഗ്ഗീസ് കരിപ്പായി, പോൾ മാളിയേക്കൽ, വിൻസെന്റ് കിഴക്കേപ്പീടിക, ജോർജ്ജ് ചിരിയൻ, റപ്പായി അരിമ്പൂപറമ്പിൽ ഡേവിസ് എരിഞ്ഞേരി, ലാലു ചിറമ്മൽ, വിൽസൻ ജോസഫ്, ഡേവിസ് മാളിയേക്കൽ, മേഴ്സി റപ്പായി, വിൻസെന്റ് അരിമ്പൂപ്പറമ്പിൽ, കെ.ആർ. ജോയ്
എന്നിവർ പ്രസംഗിച്ചു.
Leave a Reply